Silleda, 21 de maio de 2015. Hoxe quedaron rematados os traballos de renovación do alumeado público no primeiro tramo da rúa Trasdeza. O proxecto de eficiencia enerxética, con unha inversión de 48.759 euros, foi realizado pola firma Galega de Técnicas e Investimentos, coa dotación de 19 novos puntos de luz, máis altos e con tecnoloxía LED. Esta noite estarán xa en servizo todas as luminarias.

 “Esta actuación permitirá mellorar a calidade da iluminación e reforzar aomesmo tempo a seguridade viaria na rúa Tradeza”, sinala o alcalde, Manuel Cuiña.

O tramo de entrada á vila dende Santiago (dende o restaurante A Culler ata a altura do consistorio) conta a día de hoxe con 17 puntos de luz. Con este proxecto instaláronse 2 máis, pasando a contar con 19 farolas de maior altura e con luminarias LED “unha tecnoloxía que aporta máis luz e á vez permite un maior aforro”, engade Cuiña.

Esta actuación financiase con fondos municipais e coa cantidade que lle corresponde ao Concello de Silleda do Fondo de Compensación Ambiental, pola instalación de parques eólicos.

Este proxecto súmase á renovación de luminarias, tamén instalando outras de tecnoloxía LED nos 4 tramos principais adxacentes á rúa Tradeza: rúa Progreso, avenida do Parque, rúa Venezuela e rúa María Colmeiro. A inversión neste caso é de 120.000 euros e as obras está previsto que comecen a vindeira semana.