Foron adquiridos con cargo aos remanentes que lle corresponden ao Concello do Plan Concellos da Deputación de 2023

A biblioteca pública municipal Daniel Castelao de Silleda conta xa con dous novos equipos informáticos para as persoas usuarias deste servizo público, que se instalaron nos últimos días.

Esta dotación, adxudicada á firma Conta Local, levouse a cabo a través dos remanentes que lle corresponden ao Concello de Silleda do Plan Concellos da Deputación de Pontevedra, dentro da anualidade de 2023.

Con estes dous novos equipos continúa a mellorarse o servizo da biblioteca, incluída na Rede Galega de Bibliotecas Públicas, e que ademais do servizo de préstamo conta con sala de lectura e varios equipos informáticos a disposición do público.

Así mesmo, dende o pasado 15 de setembro, este centro municipal volve a aplicar horario continuado pola semana, con máis de 12 horas de apertura diaria, Así, a biblioteca está aberta de 08:00 a 20:30 de luns a venres e os sábados de 11:00 a 13:30 horas.