-A iniciativa para fomentar o consumo de peixe entre os máis novos celebrarase cos nenos e nenas que asisten ao campamento de verán do Servizo Lúdico Educativo

Silleda, 28 de agosto de 2015. A campaña “O sabor da aventura está no mar , posta en marcha pola Consellería do Medio Rural e do Mar para fomentar o consumo de peixe entre a poboación máis nova recalará en Silleda a vindeira semana.

A cita será o xoves día 3, ás 17.00 horas no pavillón do CEIP de Silleda, para os nenos e nenas que participan no campamento de verán do Servizo Lúdico Educativo.

Con esta campaña búscase ofrecer información aos máis novos acerca dos produtos do mar, afondar no coñecemento das especies e o papel das persoas consumidoras á hora de preservar os produtos do mar.

Para achegar esta información deseñouse un obradoiro lúdico que motive os cativos no consumo de productos do mar. Teatro, actividades lúdicas e reparto de agasallos e diplomas completan o programa.