Silleda,  9 de decembro de 2016. O alumnado dos dous módulos formativos do Obradoiro de Emprego Semente de Pedra 2016 que comezou o pasado día 29 de novembro en Silleda recibiron no día de hoxe formación complementaria aos seus oficios en materia de Sensibilización Ambiental.

O ciclo, de 9 horas de formación, impárteo Rosendo Luis Estévez Parada, experto docente do módulo de Mantemento de Xardíns e Zonas Verdes.

O obxectivo desta formación é introducir ós alumnos/as no coñecemento dos principais problemas medioambientais, tanto a nivel xeral como no ámbito laboral e na súa aplicación nos oficios de mantemento de xardíns e zonas verdes e colocación de pedra natural, que son os oficios que están aprendendo neste  obradoiro.

Concienciar os alumnos na importancia de reciclar, da problemática da contaminación, o efecto invernadoiro, a contaminación das augas, desforestación e desertización son outros dos obxectivos deste ciclo formativo complementario do obradoiro, que ten a súa sede na antiga cámara agraria da localidade.

A vindeira semana o alumnado recibirá outro ciclo complementario en materia de Prevención de Riscos Laborais.