Este xoves, 31 de outubro, a sesión estará enfocada no deseño gráfico

A iniciativa continuará ofrecendo formacións gratuítas ata final de ano

O Concello de Silleda continúa coas accións do Plan de dinamización do Viveiro de empresas, impulsado en colaboración coa Fundación Roberto Rivas. Durante o mes de outubro estaban previstas dúas novas formacións gratuítas dirixidas a emprendedores, empresas e profesionais que desexen mellorar as súas competencias en márketing dixital e deseño gráfico.

A primeira tivo lugar o pasado xoves, 24 de outubro enfocada no márketing en Instagram e Facebook co obxectivo de abordar estratexias para mellorar a conversión, o engagement e o posicionamento nas redes sociais. Entre os contidos, destacou a análise de tendencias actuais, a definición de obxectivos SMART e técnicas para mellorar o alcance e a participación, así como estratexias específicas para campañas de promoción.

A segunda formación será este xoves, 31 de outubro, de 18:00 a 20:00, e centrarase no deseño gráfico para non deseñadores utilizando a ferramenta Canva. Os participantes aprenderán a crear contidos visuais atractivos de forma sinxela, sen necesidade de coñecementos avanzados de deseño, e explorarán as posibilidades de Canva, tanto na súa versión gratuíta como premium. Esta formación é de especial interese para aqueles que buscan mellorar a presentación visual do seu negocio ou proxecto en redes sociais, boletíns ou catálogos. Para participar, é necesario traer un portátil.

As prazas son limitadas e é preciso inscribirse previamente a través dun formulario en liña, nesta ligazón.

O Plan de dinamización do Viveiro de empresas de Silleda, que arrancou en setembro, está deseñado para apoiar o tecido empresarial local e mellorar a súa competitividade a través de formacións prácticas e adaptadas ás necesidades actuais. En setembro desenvolvéronse dúas accións centradas no marketing dixital e atención ao cliente, co obxectivo de proporcionar ferramentas eficaces aos emprendedores e pequenos negocios. Esta iniciativa continuará ofrecendo novas formacións gratuítas ata finais de ano.