A entidade foi proposta pola mesa de contratación como a mellor das 6 ofertas presentadas, cun orzamento de 802.977,48 euros

Tamén figura na orde do día deste xoves 6 de xuño a aprobación da bonificación do IBI a un total de 125 explotacións agropecuarias do municipio

A corporación municipal de Silleda celebra este xoves 6 de xuño o pleno ordinario correspondente ao mes de maio (tralo acordo de traslado dos grupos políticos á xornada de mañá) con varios asuntos na orde do día.

Así, ademais da aprobación da bonificación do IBI a un total de 125 explotacións agropecuarias do municipio, tamén se abordarán cuestións como a contratación da obra de Mellora da Mobilidade Peonil e Rexeneración Urbana na avenida Recinto Feiral e a rúa Arturo Pérez Lázara, cofinanciada entre o Concello de Silleda e a Deputación de Pontevedra a través do programa PON2030.

A proposta da mesa de contratación, que se elevará ao pleno, pasa por adxudicar esta actuación á empresa Excavaciones Midón S.L., que presentou a mellor das ofertas ao procedemento aberto, ao que concorreron un total de 6 empresas. O orzamento de adxudicación proposto é de 802.977,48 euros, incluíndo ademais melloras como a redución do prazo de execución dos traballos en 30 días.

Na orde do día figura tamén unha modificación do anexo de subvencións nominativas, en concreto para a Festa dos Callos de Ansemil-Martixe, ao cambiar de nome a entidade organizadora, constituíndose unha nova asociación (Asociación Cultural Festa dos Callos).

Figuran tamén a dación de conta do período medio de pago e morosidade no primeiro trimestre do ano, e tres mocións presentadas polo BNG, sobre Altri, o mantemento do Centro de Saúde de Silleda, e seguridade viaria en rúa Trasdeza e Barrio do Campo.