Silleda, 22 de outubro de 2025. O Concello de Silleda resultou beneficiario dunha subvención ao abeiro do Plan +Provincia 2025, liña 1 de Investimentos, da Deputación de Pontevedra, por un importe de 8.953,39 euros, destinada ao financiamento da actuación denominada “Subministración de elementos de protección, seguridade e mellora urbana”.

A través desta achega, o Concello acometerá a adquisición de diverso material para o Departamento de Obras, en concreto elementos de protección e seguridade viaria, así como xardineiras cunha dobre funcionalidade: por unha banda, contribuír á mellora estética da contorna urbana e, por outra, previr o estacionamento indebido en zonas peonís.

Estas actuacións teñen como obxectivo incrementar a seguridade diaria nas vías municipais, especialmente nas pistas rurais e en determinados puntos do núcleo urbano, mediante a instalación de sinais, espellos e xardineiras que favorezan unha circulación máis segura, unha mellor visibilidade e a recuperación do espazo público para o seu uso axeitado.

A subministración prevista inclúe:

• 58 metros de varandas de seguridade, que se instalarán en Parada, Camporrapado e Martixe

• 6 espellos de seguridade, para colocar en Silleda, Refoxos, Fiestras, Graba e Vilar

• 4 postes para espellos

• Postes para sinais de 3 e 3,5 metros

• Sinais de prohibido o paso, dirección obrigatoria e prohibido circular camións e autobuses

• 12 xardineiras, que se situarán na Avenida do Recinto Feiral e na Avenida Pérez Lázara

Dende o Concello de Silleda sublíñase a importancia deste tipo de investimentos, que permiten seguir mellorando a seguridade viaria e a ordenación dos espazos públicos no municipio.