O Concello de Silleda pon en marcha a partir de abril un novo programa, Silleda MoveMente, con sesións de exercicio ao aire libre en distintos espazos públicos nas localidades de Silleda e da Bandeira.

Esta iniciativa, vinculada ao Plan de Saúde Mental, está dirixida a persoas de todas as idades, con dúas sesións semanais.

O programa Silleda MoveMente arrancará a primeira semana de abril con sesións na tarde dos mércores (19:30 horas) e os venres pola mañá (11:00 horas). Estará dirixido por persoal técnico da Concellería de Deportes.

“Faranse sesións en prazas e espazos públicos con estiramentos e outros exercicios dirixidos asequibles para toda a veciñanza”, explica a concelleira de Benestar», Ángela Troitiño.

Ademais dos beneficios do exercicio físico, o feito de que se realicen ao aire libre é unha das novidades da proposta, incluida no Plan de Saúde Mental do Concello de Silleda, presentado en outubro do pasado ano.

Con estas sesións tamén se amosarán os beneficios psicolóxicos da actividade deportiva ao aire libre, que aumenta a vitalidade, e mellora o benestar e a autoestima das persoas.

Este programa súmase ao exitosos Silleda Camiña, que naceu en 2021 e que se retomou este mesmo mes cunha participación que vai en aumento cada semana.

Inscricións

Para participar en Silleda MoveMente, de balde para as persoas participantes, só hai que anotarse no Concello ou chamar ao 650 95 38 72, ou enviar un mail a deportes@silleda.gal, indicando nome, idade e número teléfono de contacto.