Silleda, 30 de xaneiro de 2019.  O Concello de Silleda vén de asinar un convenio co Obispado de Lugo de cara á execución de obras de mellora no entorno da igrexa parroquial de Refoxos. O alcalde, Manuel Cuiña, e o párroco José Catanga, en representación da Diócese asinaron o acodo polo que esta última cede ao Concello de xeito temporal un terreo de 1.000 metros cadrados ao longo do camiño que se pretende ampliar.

Con esta cesión, no lugar de Lázara, e ca dos propietarios doutras parcelas da zona, que xa amosaron a súa conformidade ao Concello de Silleda, poderase levar a cabo nos vindeiros meses unha das actuacións máis agardadas nesta parroquia.

Así, está previsto ampliar o viario de acceso á igrexa, duns 300 metros, un camiño estreito e moi deficitario no que só se pode circular nun único sentido. Ademais de ampliar esta pista, contemplase a creación dunha zona de estacionamento de uso público nas inmediacións do lugar do Lázara.

“Trátase dunha actuación que veñen demandando os veciños e veciñas de Refoxos nos últimos anos, e unha vez obtida a conformidade dos propietarios destes terreos e tamén do Obispado, podemos plantear levala a cabo, xa que esta zona conta cuns accesos moi deficientes”, indica o alcalde, destacando que a mellora suporá dotar a Refoxos con este servizo.

Cuiña agradece aos veciños de Refoxos e ao Obispado de Lugo a súa boa disposición para que a mellora se poida materializar.

Esta actuación súmase a outras previstas nas vindeiras semanas para o rural, coa mellora de distintas infraestruturas viarias.