O Concello de Silleda vén de iniciar as obras de reforma e mellora do palco e dos aseos públicos de Breixa, unha actuación moi demandada pola veciñanza desta parroquia sillendense e que permitirá mellorar de xeito notable a accesibilidade e funcionalidade destes dous espazos públicos situados no entorno do centro social da localidade.

A intervención inclúe a mellora do palco da música, coa execución dunha rampla de acceso que facilitará o seu uso por parte de todas as persoas, así como a reforma integral dos aseos existentes, que serán substituídos por unha nova edificación con dous baños, un deles adaptado, garantindo así condicións adecuadas de accesibilidade.

As obras están a ser executadas no marco do Plan Máis Provincia da Deputación de Pontevedra e foron adxudicadas á empresa Construcciones Míguez Xestoso S.L. por un importe de 28.139,82 euros.

Desde o goberno municipal, a alcaldesa e responsable de Obras e Servizos, Paula Fernández, que hoxe visitou os traballos xunto ca concelleira de Cultura, Mónica González,  destaca  que se trata “dunha actuación necesaria para dignificar e modernizar uns espazos moi utilizados pola veciñanza e polo tecido asociativo da parroquia, especialmente en celebracións, actos culturais e encontros sociais”.

Melloras noutros centros sociais do municipio

Así mesmo, o Concello de Silleda lembra que, a través deste mesmo programa provincial, tamén se levarán a cabo obras de mellora nos centros sociais das parroquias de Abades, Saídres, Piñeiro, Lamela e no centro social do lugar de Curro, na parroquia de Cira, continuando así coa aposta municipal pola mellora das infraestruturas públicas no rural.