Silleda, 30 de marzo de 2015. O Concello de Silleda contará dende mañá e ata o mes de setembro con 24 novos operarios/as, ao abeiro do Plan  Provincial de Fomento do Emprego. Este personal, outorgado a todos os Concellos da provincia de Pontevedra  de menos de 50.000 habitantes, adicarase no caso de Silleda ao desenvolvemento dun plan de conservación e funcionamento de bens e servizos municipais.

O alcalde, Manuel Cuiña, acompañado dos concelleiros Klaus Brey e Pilar Peón, e de coordinadores de distintas áreas de traballo municipais, mantivo hoxe un encontro cos operarios seleccionados,  que comezarán xa mañá a traballar.

A limpeza de zonas urbanas e vías, o acondicionamento de áreas recreativas e sendeiros,  sinalización, desbroce e limpeza de camiños e zonas turísticas, e a realización de tarefas dentro do programa de aforro enerxético,  son algunhas das actuacións que levarán a cabo.

O equipo estará formado por 6 peóns de varrendeiros, outros seis de  xardinería, outros dous para desbroces, 1 peón electricista, 6 de construcción, 2 como pintores e 1 para limpeza de edificios.

A selección, ao igual que en anteriores convocatorias  foi realizada a través do Servizo Galego de Colocación (INEM).  Estes contratos serán de intereses social a tempo parcial (25 horas semanais) e terán unha duración de 6 meses.