– Ó ampliarse as horas de luz natural, o edificio estará aberto de martes a domingo ata as 20.30 horas, permitindo a entrada ata media hora antes

Silleda, 30 de xuño de 2016.  O mosteiro de Carboeiro modifica o seu horario de visita para adaptalo ao verán, e aproveitar máis a luz natural, así como dar máis cobertura aos turistas que soen aumentar a afluencia ao enclave con motivo das vacacións e o bo tempo.

Así o horario de apertura será de martes a venres, (os luns continuará pechado ao público) de 11.00 a 14.30 e de 16.00 a 20.30 horas. Os sábados, domingos, e festivos, o horario será continuado, de 11.00 a 20.30 horas. En todos os casos, o acceso ao enclave e a venda de entradas efectuarase ata ás 20.00 horas.

Os prezos seguen sen variacións. Así, a entrada simple custa 1 euro, a visita guiada 3 euros, e a visita didáctica 4€. Os colectivos de rapaces de entre 6 e 16 anos, así coma os estudantes e desempregados poderán acollerse á entrada reducida, pagando 0,70€ pola entrada simple, 2,10€ pola visita guiada e 2,80€ pola visita didáctica. A entrada para os menores de 6 anos non terá custe algún.

Este horario de verán aplicarase ata novo aviso do departamento municipal de turismo, que dirixe a concelleira Ana Luisa González Costa.