• A actividade, incluída na programación “A palabra rebelde” arredor de Begoña Caamaño, desenvolverase os sábados 2, 9 e 16 de maio na Biblioteca Daniel Castelao

Silleda, 15 de abril de 2026.- O Concello de Silleda vén de abrir o prazo de inscrición para participar no obradoiro de escritura creativa e creación de fanzine “A palabra rebelde. O fanzine como ferramenta de expresión”, unha das propostas incluídas na programación do Mes das Letras Galegas 2026, dedicada este ano á figura de Begoña Caamaño. Esta actividade forma parte do programa cultural presentado polo Concello para o mes de maio baixo o lema “A palabra rebelde”.

O obradoiro, impartido pola escritora e activista cultural  Llerena Perozo, desenvolverase en tres sesións os sábados 2, 9 e 16 de maio, en horario de 11:00 a 12:30 horas, na Biblioteca Daniel Castelao de Silleda. Trátase dunha proposta de carácter práctico e participativo na que se combinarán o adestramento da creatividade, a introdución ao formato fanzine e a elaboración dunha creación colectiva. A actividade partirá da figura e da obra de Begoña Caamaño para dar paso á creación de contidos propios a través da palabra e da expresión artística.

O obradoiro está dirixido a persoas a partir de 12 anos e as prazas son limitadas. As persoas interesadas poden formalizar a súa inscrición a través do correo electrónico cultura@silleda.gal ata o vindeiro 29 de abril.

Ademais da vertente formativa e creativa, esta actividade terá tamén proxección pública, xa que o fanzine resultante será exposto o 17 de maio, coincidindo co Día das Letras Galegas, na praza Siñor Afranio, dentro da programación prevista para esa xornada. A propia programación do Mes das Letras inclúe esa exposición como resultado do proceso creativo desenvolvido no obradoiro.

A concelleira de Cultura, Mónica González, anima á veciñanza, especialmente á mocidade, a participar nesta proposta “que une creación, pensamento crítico e expresión libre arredor dunha autora tan inspiradora como Begoña Caamaño”. A edil sinala ademais que “o formato do fanzine encaixa moi ben co espírito desta edición das Letras Galegas, porque permite experimentar coa palabra desde unha óptica aberta, rebelde e moi participativa”.

Con esta iniciativa, o Concello de Silleda continúa a desenvolver unha programación plural e aberta á cidadanía para celebrar o Mes das Letras, combinando actividades de creación, teatro, música e animación cultural arredor do legado de Begoña Caamaño.