Silleda, 10 de maio de 2016.  A Concellería de Cultura de Silleda vén de abrir o prazo para participar no desfile e o playback da Romaría do Rapaz, que celebra a súa vixésimo oitava edición o vindeiro domingo día 26 de xuño, no recinto da Saleta, en Siador.

Estas actividades están dirixidas a nenos e nenas de 3 a 12 anos de idade que estean empadroados no concello.

As persoas interesadas deben de anotarse nas dependencias da Casa da Xuventude, (986 580064). O prazo de inscrición remata o vindeiro venres 27 de maio.

Posteriormente á inscrición informarase aos pais dos nenos dos horarios e procedementos a seguir para a realización dos traxes, decorados, e os ensaios, que serán levados a cabo polas monitoras responsables do servizo de canguraxe.

 Deste xeito, os nenos e nenas de Silleda continúan a participar activamente na Romaría do Rapaz, continuando coa filosofía desta celebración, feita por e para os nenos/as.

O programa da XXVIII Romaría do Rapaz será dado a coñecer nos vindeiros días dende o departamento municipal de Cultura de Silleda.